民建聯假假哋都係香港第一大愛國政黨，黨主席馬力當然係中方紅人，無論點都會有中央照住。之不過，患過結腸癌嘅馬力身體一向麻麻，外界成日都好擔心佢又有事，好彩馬力休養完一輪都算龍精虎猛，今次仲可以帶隊上京，令唔少人放下心頭大石。
好似民建聯噚日朝早拜會港澳辦副主任陳佐洱時，陳副主任一見到馬力時，就即刻好鬼熱情，除咗向傳媒表示歡迎民建聯喺北京最好嘅季節到訪，希望佢哋對北京留下美好印象之餘，更特別點名提到，最開心睇見患病嘅馬力容光煥發，搞到馬力都有啲唔好意思，當然，陳佐洱都好關心選委會選舉。
講馬力就講到興高采烈，一講煲呔陳佐洱就封嘴，唔通馬力比煲呔，更值得中央領導人關心？莫非呢啲就係中央領導嘅親疏有別？