為咗提升代理專業水平，地監局上年開始大幅加深從業員考牌試（俗稱細S牌）嘅試題難度，搞到唔少人肥佬，牙痛咁聲。祥益地產人力資源部主任黃詠琳Winnie睇見呢個新形勢，決定親身上試場一次，一方面想掌握多啲考試題目，方便制訂日後嘅培訓策略；另方面希望以實際行動為前線員工打氣。
早排出成績表，呢位已獲「大E牌」資格嘅一姐不負所望，輕易以「成績優異」級別取得S牌。Winnie話今次考試題目確係冇以前咁直接，但咁至顯得牌照矜貴，仲鼓勵未攞牌嘅拍檔繼續努力！
做地產代理有時壓力真係幾大，所以香港置業一班做緊葵涌都會天峯嘅代理，噚日就忙裏偷閒，約埋發展商長實副首席經理黃思聰一齊去打保齡減壓，希望充電之後可以開到更多單。