本港學術界盛事邵逸夫獎頒獎禮，噚晚喺香港會議展覽中心舉行，今年係第三年，場內可謂衣香鬢影，筵開60席，多達480位來賓到賀。當中梗係唔少得特首煲呔曾，佢結上銀煲呔，仲巴閉到要勞煩90幾歲同80幾歲嘅主人家邵逸夫（六叔）同諾貝爾物理學獎得主楊振寧，親自到會場外迎接，咁煲呔都好識做，撐足全場先走。
講起六叔，佢噚晚6點幾到場，由私人女秘書輕扶，但未見六嬸方逸華同行。
六叔好鬼精神，行行吓甩開女秘書自己行，步履都算輕盈。有趣嘅係，曾一度深受六叔愛護嘅藝人曹眾，與六叔前後腳到。
未幾，六嬸一身黑色套裝到場，圍住紅絲巾，滿場飛同啲賓客傾偈；唔單止咁，今次嘅頒獎禮無論會場布置、紀念品，以至全場菜式，都係由六嬸一手一腳搞掂；唔怪得TVB同邵氏都管得咁掂。
王曉東教授勁讚太太
噚晚嘅菜式共有五道，頭盤係帶子同小龍蝦，跟住係蟹肉燴生翅，主菜係銀鱈魚柳，之後有香茅雪糕同四式糕點，有出席嘅賓客大讚好味道。大會仲喺枱上擺咗個玻璃花銀包，放咗鮮花同會發光嘅膠水晶，作為紀念品送畀來賓。
不過，六嬸都有預計唔到嘅事。話說頒獎完畢後，六叔同啲得獎人梗係一齊影張威威合照。工作人員推塊八呎高嘅背景板出黎，登登登．．．．．．！上面寫住「THESHAWPRIZE」嘅英文字甩皮甩骨，認真掃興兼失禮，照計一號風球，吹唔到入會展；好彩主持人鄭裕玲識執生，即刻話轉個背景先影。
講番今屆獲獎嘅學者，共有六人，佢哋噚日分別上台分享得獎感受。其中獲得生命科學與醫學獎嘅美國德州大學西南醫學中心終身教授王曉東，一連多謝10幾人，其中包括台下一女士。王教授形容嗰位女士美麗得可以做模特兒、生咗兩個後仲可以攞兩個博士學位、默默陪伴佢19年。嘩，八方估佢一定讚梗佢老婆，當住咁多人咁讚王太，一定開心到暈。
其餘五位得獎者分別係獲得天文學獎嘅索爾．普密特（SaulPerlmutter）、亞當．利斯（AdamRiess）和布萊．施米茲（BrianSchmidt），以及數學科學獎嘅大衞．曼德福（DavidMumford）和吳文俊。每個獎項100萬美元獎金，每項多於一名得獎者由各人平分。
作為評審會主席嘅楊振寧噚日一個人出席，佢位太座翁帆因為有事做唔嚟得，記者問佢有冇計劃添丁，佢即刻笑住耍手擰頭。
