港島南區係豪宅地段，山明水秀，一直吸引實力買家追捧，美聯分行高級營業經理高美燕話南灣道華景園1座中層B室，面積3061方呎，由區內換樓客以2800萬承接，呎價9147蚊，屬市價。
躭18年升值5.2倍
照計呢個價都好平常啫，但若果聽埋話原業主轉手一鋪勁賺2351萬，升值5.2倍，係咪覺得完全唔同呢？若果單靠打工，好多人做幾世都儲唔到呢條數。
呢個幸運業主嘅單位，係四房雙套房設計，附露台，擁有山同海景，環境非常之正。佢仲係喺大廈入伙2年後嘅88年，用449萬買番嚟。
經過十幾年嚟樓市幾番起跌，揸咗18年至肯賣，仲勁賺一大筆㖭，係咪高手呢？蘭西真係要寫個服字。
之前3宗全蝕讓
華景園共有3座住宅共174伙，今年錄得4宗買賣，之前3宗都係蝕讓，好似3月成嘅3座7樓B室，1657方呎，成交價1230萬，揸近9年，唔見咗35%。
而2座14樓B室，1463方呎，6月以1168萬沽出，蝕112萬，縮水9.4%，已經算係蝕得少好彩㗎嘞。所以呢個1座單位業主，係今年至今唯一可以賺錢走人嘅幸運兒。
電郵地址：[email protected]