對手數碼通喺嗰邊就贊助馬會跑馬地百萬挑戰盃06/07吸引用戶注意，電盈亦唔執輸，早輪將now寬頻電視放喺自己個流動電話網絡畀用家試玩，噚日佢哋終於公布正式推出有關服務。
除咗試用嗰陣提供兩條本地新聞頻道，即now財經台，同24小時亞視新聞台外，今次仲加多兩條國際新聞頻道，CNN及CNBC。此外，仲有ESPN台，睇足球賽事精華。日後亦會再加入兒童台、FashionTV同SoundtrackChannel等等。似乎真係想將個流動電視嘅內容，做到啱晒不同觀眾嘅口味。
不過，講到尾最吸引嘅，應該係由現時到明年1月2日前，所有電訊盈科嘅流動通訊用戶，都可以唔使錢喺手機上面睇now寬頻電視。而華華最鍾意嘅，係佢哋繼續搵林海峰拍廣告，繼續扮鬼扮馬。