上星期五見到《蘋果》頭版新聞，竟然係英國式政變，貝理雅被逼下「台」，不禁嚇咗一驚。政治新聞唔係票房毒藥咩？何況係英國政治新聞？《蘋果》認真大膽，偶然一次表示自己與別不同，領先潮流，果然不同凡響，將對手拋在後頭。
呢類新聞就好合左丁山口味，一早上咗英國傳媒網站，睇「貝理雅的血腥四十八小時」，知道財相白高敦步步進逼，發動後座議員叛變，將貝理雅拉下馬，貝理雅本來同白高敦有君子協定，兩兄弟輪流做莊，但係坐上首相寶座，住在唐寧街十號會住上癮，點會有人肯自動搬走㗎。權力如鴉片，好難戒得甩嘅。
貝理雅嘅政策愈嚟愈似布殊，白高敦就仍然保持一啲傳統工黨作風（例如貝理雅主張增加大學學費，白高敦反對），兩人愈行愈遠，再拖落去，兩人都老咯，雖然貝理雅只得五十三歲，但當權太耐，選民會討厭。而且近日發生兩單大事：（一）保守黨民望自九七年選舉失敗以來，首次超越工黨；（二）倫敦破獲恐怖分子大陰謀之時，貝理雅在加勒比海度假，指揮若定，大出風頭嘅係內政大臣韋俊安，冇人理會白高敦。即係話，下次大選之時，工黨可能下台，即使仍然係工黨主政，貝理雅唔做，都可能有其他人冒起，挑戰白高敦嘅承繼人地位。
白高敦與成班謀臣覺得時不我與，須速戰速決，故此急下殺手。不過事情往往不如想像中咁順利，貝理雅被迫宣布一年內鬆人之後，工黨一啲老臣子不滿白高敦不忠，正發動一場GetBrown運動，係要同佢一拍兩散，令到貝理雅下台之時，白高敦都要鬆人。最偷笑嘅當然係保守黨，十年來每次換黨魁，都冇乜人記得黨魁叫做乜嘢名，點知工黨內訌，令保守黨重新掌權嘅希望，露出一線曙光。搞政治，淨係講叻，唔得嘅，彭定康夠叻啦，幫助馬卓安「政變」鬥垮戴卓爾夫人，從此被保守黨放逐於外，白高敦與貝理雅係工黨之一時瑜亮，呢次出重手逼宮，未必能圓首相好夢。