由Vodafone802SE年代開始，直至到902SH、903SH等幾隻日版手機，一直以來勁多人Buy，甚至嚟到上個禮拜，903SH更因貨源不足，機價突然暴升近$600，差不多四千先玩得起！不過之後嘅日子究竟係點就好難講，事關有網友報料，指SHARP最Hit嗰部904SH已經俾日本廠商加咗塊芯片入去，一旦用唔正當途徑嚟解除SIMLock，手機主板會即刻燒，如果屬實，對水貨佬、買家嚟講，打擊就非常大！
網友爆料話，呢項咁「絕」嘅封鎖行動，其實係針對大陸以及香港改機佬而設！記得903SH剛推出嗰陣，日本廠商已非常關注香港人走日版水機嘅嚴重情況，於去年底，Vodafone更試過將903SH列為停止發售產品，雖然官方網址註明只係「唔夠貨」，不過行內人士解釋，實情就係想遏止本港水貨佬嘅行為！究竟今次904SH係咪傳聞所講咁恐怖，改親機就燒主板呢？聽聞有部份「入定貨」嘅水貨佬，收到消息之後已經將904SH調低至$1,400賤價出售，睇嚟可信性又幾高喎！
記者：陳國輝
http://www.ima-mobile.com/