宋太一家四口，啱啱買咗架豐田RAV4四驅車。「買RAV4原因好簡單，佢放得入我哋宋氏沙灘１７寶。仔女好鍾意去沙灘同郊外，私家車唔啱用，逼爆倉就坐唔到人。七人車？唔同㗎，用RAV4個四驅系統，可以輕鬆咁揸去好多郊外地方，我哋上星期先去完白泥，好好玩。」
記者：黃婉冰
攝影：何家亮
17件去玩必備雜物
1.手提式旅行雪櫃 1個
2.大型太陽傘 1把
3.炭 1包
4.燒烤叉 5隻
5.軚盤防盜鎖 1把
6.滑板 1塊
7.摺合式櫈仔 1張
8.伸縮式膠桶 1個
9.旅行藤籃 1個
10.魚竿 1支
11.釣魚用品工具箱
12.水槍 1支
13.水果袋 1個
14.沙灘蓆 2張
15.飲品 6支
16.大水泡1個
17.大鱷魚浮床1張
一向鍾情私家車的宋氏伉儷，一個月前買了最新的RAV4四驅車，何解突然轉投四驅車陣線？「因為要放入我哋去玩的17樣物件。」
宋太：「其實我一向都鍾意四驅車，之不過以前四驅車無咁多款，唔似得𠵱家啲咁舒服，而且同小朋友去沙灘玩，要帶好多東西，私家車根本載唔晒，咁啱見到RAV4符合晒所要條件：4門設計、車廂空間大、尾廂容量大，試車後我覺得好好揸、易操控，車身唔算太高，尤其是個軚盤好柔，輕輕力已經可以轉向自如，睇位泊車都唔算好難……」
軚感柔啱女人
宋生（忍唔住插嘴）：「我就覺得個軚盤柔咗啲啦，女人揸就會覺得好易上手，但男人就會覺得軚感唔多夠，可能我揸慣房車，軚感重啲，可以放心掟彎，呢架車感覺就完全唔同，開頭揸都有少少唔慣，但無所謂，都係老婆用，佢鍾意咪得囉！」
宋太：「你成日開快車，呢架舒服又好用，上斜、起步夠力，最好係佢有埋個差速系統，四條胎咬地啲，落雨載住小朋友都唔怕跣胎。整體嚟講我都幾鍾意呢架車，唯獨是有陣時起步要畀重油，1波去2波略嫌長氣咗少少，但我覺得呢個問題不大，最緊要係佢夠爽快。」
車身高睇位好
宋生：「其實我哋都有諗過買旅行車或七人車，但感覺始終太大架，外形唔及四驅車咁輕巧，仲有係入唔到低矮停車場，而且老婆揸四驅車，車身高睇位睇得通。我見架RAV4個尾廂都夠大，又唔會話太難入停車場，車身唔巨型，平時佢揸去湊放學、去街市都無聽佢話有問題。」
宋太點睇：
「唔使插匙，㩒掣就可以開關引擎，方便。」
「平時兩隻手攞滿餸，袋住個遙控行埋去就可以開車門，唔使㩒、唔使插匙，真係方便好多。」
宋生點睇
「我啲仔女最鍾意打開車頂個大天窗，佢哋話睇住啲雲一路飄過，好得意㗎。」
「拍低椅背後放得仲多嘢，我最鍾意揸佢去釣魚。」
宋氏兄妹有Say：
「我每次喺車尾攞玩具都唔使大人幫㗎。」
「我最鍾意就係個大尾廂，事關可以放晒我啲沙灘玩具，連張大浮床都擺得入。」
宋家Profile：
宋太
年齡：3ｘ歲
買車要求：最緊要易睇位、易操控、容量夠大(儲物或載客要多)。
宋生
年齡：3ｘ歲
買車要求：要夠力水、起步爽快、坐得舒服，唔好咁大食。
Keito
年齡：6歲
坐車要求：舒服，夠位我同妹妹一路坐車一路玩。
Saya
年齡：3歲半
坐車要求：可以畀我擺好多好多……玩具。
ToyotaRAV4規格
引擎：1,998c.c.直4DOHC
馬力：152ps/6,000rpm
扭力：19.8kgm/4,000rpm
傳動：4前速自動波
售價：$255,960
查詢：皇冠汽車（23054555）