無論大屋或細單位，居住空間多或少，每個人都想有個安樂窩，住得舒適。不過，假如樓上樓下，隔籬左右有個唔生性嘅鄰居，美夢便破碎。在《Unwantsforum》就有一個投票，選出缺德的鄰居行為，共有420人投票，最多人選「製造噪音」最討厭，有163人，比例約39%；其次係揀「出入關門特別大聲」亦可惡，有73人，約17%；第三係「任由小孩大吵大鬧」，有59人，佔14%。
以上三類缺德行為比例共70%，全部都與聲浪有關，反映普羅大眾最憎嘈喧巴閉。其實可以理解，香港地小，人多車多，周圍環境已夠嘈雜，返到屋企，當然想唞一唞，靜一靜，瞓覺好。
其他缺德行為，仲有半夜吵架、倒垃圾只放垃圾筒面及旁邊。不過，住喺平台單位嘅網友bbstar601mk則身受其害：「我個平台基本上是個垃圾總會，每天清掃都徒勞無功，樓上將用過啲煮食油同菜，一併倒下來；牙籤、廁紙、馬經、六合彩票......一大袋垃圾亦倒下來，簡直嬲到震，向業主立案法團反映過，但佢哋無理會，因為主席都有份掉。」
網友魯肅亦唔好彩：「我以前屋企對面有人借大耳窿，係我屋企對面勁拍門追數，搞到我勁驚，仲搬走埋。」
此外，現行法例中，特設《噪音管制條例》，專門針對由裝修工程引起噪音，噪音管制時間為平日晚上7時至翌日上午7時，以及公眾假期（包括星期日）任何時間。在管制時間內，無領有「建築噪音許可證」而施工，最高可被罰款10萬元。記者認為，受害人如果勸喻對方無效，就應報警，由警員上門調解。
hitrate指數：2850次