一日大跌，一日大升，港股喺17000水平反覆，暫時都係上落市，期指大升178點，由低水變番高水。
荃灣青龍頭住宅地底價3000萬，結果以5300萬元成交，買家係新地（016），大雞食細米，出人意料之外。大藍籌全面報升，但建設銀行（939）同中石油（857）有好多窩輪到期，股價會有壓力。
內地宏調未完，有消息話國慶之後會再加息，一眾內地房產股齊齊腳軟，中國海外（688）創完新高後回頭，調整一下，係好事，呢隻股票流通貨源九成在基金手中，整固後再創新高可期。
月初推介華基光電（155），股價由0.59元急衝上0.68元，調整後噚日升勢又再現，收0.61元，升2仙，兩次拋離10日線（0.59元），升破前高位0.68元後，可向1元水平推進。華基牛皮整固3個多月，大戶收集完成，等機會造上。
益安（082）衰收尾，成個破位而上仲有大成交支持嘅大好形勢，臨尾10分鐘完全破壞晒，有目的嘅沽盤好明顯係要質到最低收，消息話公司要做「披成」，如果「晒士」唔大，而貨源又係自己友同基金攞晒，好戲仍會在後頭。
重上3條平均線
華翔微電（1195）消化完，睇勢又會炒一轉。7月底初次推介，股價立即有反應，由1.09元湧上1.35元。
華翔近1個多月來，形成另一個小圓底，現時股價已重上3條平均線之上，一衝破1.17元阻力，可重上1.35元高位。
華翔主要產銷印刷線路板，行業好好景，集團業績亦有好表現。06年度（6月結）盤數好快會知，半年已賺5060萬元人民幣，估計全年可達1.02億元人民幣，每股盈利折實21.2港仙，以保守的8倍計，股價已可見1.60元。
華翔主席林萬強上周四減持1000萬股，每股作價1.05元，減持後股價升上1.17元，看來貨源應落在強者手中，可以憧憬。
郭兆誠