昨日外圍股市表現平平，但港股照樣反彈，回升126點，收17105，主要是現時有大量新股上市，大量游資湧入香港搵食，自然有實力人士在維持秩序，唔俾人搞寸嗰Party。
大行老友昨日約食午飯，見面時陰陰笑問趙飛雲今日沽乜嘢？趙飛雲自然知佢取笑，因為近排買賣頻密，但就幾乎沽嗰隻升嗰隻，好似早前天津環保創業（1065），近日的第一太平（142）及昨日的駿威（203），都係hit咗計數位之後掉頭上升，甚至昨日的嘉利盈（8029）亦幾乎在早市沽出。其實凡事皆有兩面，嚴守紀律可控制風險，避免損失擴大或利潤被侵蝕外，有時亦會令你錯失贏大錢的機會，這方面除了講求拿揑準確外，很多時要講求運氣。
基金股長升長有？
此外，要揀長升長有的股票外，除公司基本因素佳外，最重要是有大行睇起，唱好之餘亦身體力行買入及叫大客捧場，好似近期內地推出多項壓抑樓價的宏調措施，但有幾隻基金坐盤的內地地產股，一樣照升如儀，高處未算高。不過，趙飛雲見識過中移動（941）未改名前叫中電信的狂升狂跌走勢後，對基金股存有戒心，今日思捷（330）公布業績，有貨祝好運。
趙飛雲