人稱蝦叔的資深藝人關海山（原名關寧），演技出神入化，喜好杯中物，圈中人緣甚佳，是一位敦厚長者。蝦叔01年3月腦血管栓塞，導致右半身癱瘓，需坐輪椅代步，自此全面退出幕前演出。蝦叔昨日猝逝，享年80歲，曾跟他在劇集結緣的藝人吳鎮宇、宣萱、鄭少秋和薛家燕等都惋惜不已，紛紛大讚他生前演技出色，並表示會永遠懷念他。採訪：比華利
鄭裕玲 一種解脫
第一套同蝦叔合作就係《網中人》，以前同蝦叔拍戲，好多時佢都係做我老竇，所以好多時間對住，佢係一個好演員，好好嘅老人家，好多時同蝦叔都係拍戲劇性強嘅劇，所以好少講笑，尤其係拍劇情戲佢唔會同你講嘢，如果唔係一take過，佢會教你點樣做，𠵱家好少有前輩會教做戲，記得有一年台慶蝦叔攞獎，見到佢都有少少心「噏」，過身可能係一種解脫，希望佢老人家冇遺憾咁走。
吳鎮宇 提攜後輩
我好記得蝦叔一句金句，佢話過做戲只係要畀一個反應，每一場戲就只需搵一個反應表現一吓，同埋每套戲只要做個ending，因為觀眾只會將個ending銘記於心。其實佢老人家都開心完，之前行動不便又咁耐啦，以宗教嚟睇佢還完債係一個解脫。蝦叔個人好幸福㗎，成日贏馬㗎，又係唯一一個人可以喺電視城飲酒。我喺蝦叔身上重學到活到老學到老呢個道理，而且佢係做到學無前後，達者為先。之前我同佢合作過《生命之旅》，又試過陪佢食消夜，同佢飲酒飲到面都紫埋。
羅家英 靚仔小生
我做文武生時，蝦叔都已經係小生，同佢合作過粵劇《蟠龍令》，我知道蝦叔喺好後生時都已經擔大旗，對佢最深印象，係佢成日飲酒，我覺得佢喺粵劇表現好現代化，演得好好，波叔（梁醒波）就幫蝦叔改咗個花名叫cowboy，就算佢演戲都好有現代感，往往有神來之筆，仲有佢年輕時好靚仔。
張兆輝 親如老竇
我同蝦叔合作過《情濃大地》，嗰時佢已經話開始減產啦，話想唞吓。初時見到蝦叔覺得佢好似我老竇，因為佢成日都瞪大對眼講嘢，而我老竇就成日瞪大對眼鬧我。我好記得佢唔使帶劇本入廠，佢又唔會鬧人嘅。做完一場戲就會行埋一邊食支煙飲啖酒，佢似屋企人多過同事。
薛家燕 記憶力強
知道蝦叔走咗，我立即聯絡蝦嫂睇吓有冇嘢幫手，佢喺個電話度係咁喊，似乎仲未接受到呢個事實，不過蝦嫂話佢離開時個樣都好安詳。蝦叔好大啤酒癮，試過同我出埠登台，佢飲到面紅紅俾蝦嫂鬧，有時拍劇雖然都會飲少少，但就絕對唔會唔記得對白，只會有時頻頻去廁所。
李香琴 好戲之人
我都係大約今朝十點幾收到呢個消息，都有打畀蝦嫂安慰佢，佢話蝦叔去得好安詳，我都希望佢去得舒服，唔好再咁辛苦，佢真係一個好戲之人，同佢拍《親情》嘅時候佢成日唔開心，原來佢話因為要培養情緒，投入角色，我有時間都會探下蝦嫂，相信佢哋經濟上都冇乜問題。
