上海電氣（2727）上周四復牌，股價先急跌後回穩，之後曾大幅高於停牌前水平，噚日隨大市下跌8仙，收報2.62元，仍高於停牌前嘅2.55元，唔少散戶對呢隻股票有憧憬，相信3蚊在望。
「Yahoo討論區」內，網友codychoi2001認為：「有排追落後，而且大戶入市超積極，淨係睇成交連續2日比平時多幾倍，一定唔會係散戶入貨啦。」chihong_kan就話：「不用多說，必升上3元……有買趁手。」stockman2626亦相信下星期股價指向3蚊。
對於一眾好友嘅評論，greensongreen有保留：「挪用公款而冇人發覺，代表公司機制有問題，盈利上升可能只係會計賬目上嘅財技，而且PE值偏高，2727現金流出現倒退，代表公司業務正在倒退，只可作短線炒賣，不宜作中/長線持有」。
上氣復牌3日，股價最高見2.74元，上星期五圖表上形成早晨之星，呢幾日成交大增，係好現象。噚日雖跌近3%，成交相對減少，短期博佢填補下跌裂口2.72至2.81元，然後挑戰3蚊，跌穿2.50元止蝕。
余文