當國企銀行個個都爭住「走出來」嘅時候，香港銀行就搏晒命「打入」內地，前者梗係求境外資金，後者則吼實祖國大戶，大筆大筆嘅財富資產，總之就係各有所求！講到喺內地搞得最積極嘅外資銀行，滙豐一定排頭三位，佢哋噚日又話喺北京開多一間支行，仲因為咁，而做咗北京最多網點嘅外資行㖭！
滙豐話，呢間係燕莎中心嘅支行，係佢哋喺朝陽區內第二間店，亦係北京第四間舖，交通好鬼方便。喺呢啲咁值租嘅地點開舖，仲要以提供一對一嘅理財服務為主，對象就梗唔係一般簿仔客，而係有番咁上下資產嘅卓越理財客人。
據華華所知，滙豐80年喺北京設代表處，95年升格做分行，家吓喺當地有成355個員工，以近年嘅發展速度嚟睇，內地分行嘅數目，升勢會愈來愈快。