Ada係我最好嘅朋友，佢近來好煩，因為佢媽媽身體唔係咁好，男朋友又好似有第三者。佢前幾日攞住束好大好靚嘅玫瑰同我講：「係佢送畀我㗎，想保存耐啲，可唔可以幫我。」
我記得喺網上睇過一個日本短片，將支菊花用暖水浸十幾分鐘再插入花樽；旁邊另一個花樽就插一支無浸過暖水嘅菊花。鏡頭捕捉兩支花幾日內情況，結果一般菊花兩、三日後謝咗，浸過暖水嘅生存放多一、兩日。
我打電話畀鮮花零售業協會主席謝黃小燕，佢解釋係，因為花莖俾人剪開，裏面嘅纖維會生埋，封咗個剪口，好似人嘅傷口癒合咁，亦會阻礙支花吸取水份。用暖水浸過，啲纖維無咁易生埋，支花可以吸收大量水份同養份，生存耐啲。q(~_~)p
想花蕾快啲開，都可以用暖水嚟插花，「唔好用熱水，會淥死支花。」佢仲話，放一滴漂白水入花樽殺菌，支花都可放耐啲。
五日後，Ada再搵我，話束玫瑰真係放得耐咗：「不過，我媽媽過咗身。」佢叫我唔好難過，因為呢啲係人生必經階段，「因為咁，我終於醒覺，花就話可以用方法擺耐，人與人嘅關係就唔可以太執着，勉強無幸福。我決定同男朋友分手。」p(~_~)q
逄周一至周四刊出