茶餐廳情意結

相信無一個香港人未幫襯過茶餐廳，雖然大家都知衞生條件麻麻哋，但可能係情意結，香港人總唔會討厭茶餐廳，不過網友isaac就好理性咁提醒大家：「在港式茶餐廳，有八種東西你千萬不要點……」節錄部份要點如下：「不要喝冰水，那是自來水加冰；不要喝變苦的凍檸茶，好的檸檬不會變苦，檸檬茶苦了只有一個原因，檸檬變壞了；不要在晚上點咖啡，那些都是早上或是下午泡的，久了就會變黑，而且也不潔；不要繁忙時間喝檸茶，有些無良的水吧，在繁忙時會把侍應收回來的茶倒在你點的檸茶裏；食物的配菜最好不要吃，因為是翻用。」類似衞生問題大家聽過唔少，網友badboy聽完就話：「睇完都唔敢出街食野（嘢）！」講真又唔使咁誇張嘅，正如刺客天使話：「我諗都係某部分（份）啫，唔係全部都咁。」再講，你保證到其他食肆唔會咁做咩？出街食飯，預咗㗎喇。