歐冠盃分組賽今個周中開鑼，喺廣大股迷心目中，5號仔（滙豐）梗係香港大藍籌，唔計佢升值，每年都起碼收5厘息；咁賭歐冠盃又有冇大藍籌？當然有啦，就係啤酒之國──德國嘅拜仁慕尼黑，今個周中重心W就揀拜仁啦！文：牽牛
歐洲足協早前就公布，歐冠盃改制後14年來最高收入嘅球隊，大家一定以為唔係巴塞就係AC米蘭；錯，原來係啤酒之國──德國嘅拜仁慕尼黑。拜仁能夠收入最多，並唔係攞冠軍最多，事實上近14年來，佢哋只係01年攞過1屆冠軍；拜仁有咁高收入，贏在穩定性，近14屆只有4次缺陣歐冠盃，而且係分組賽表現亦都好穩定，連續3屆分組賽可以晉級，可以講係歐冠盃大藍籌。
拜仁主場威力猛
拜仁嘅藍籌威力，係佢哋個安聯主場；拜仁已經係分組賽主場連贏4場，上屆更加喺主場擊敗祖雲達斯，呢啲數據絕對畀到大家信心；特別係歐冠盃講求經驗同節奏嘅比賽，拜仁陣中夠「卡士」嘅球員多不勝數，馬卡爾、簡尼呢啲係就係老啲，不過去到大場面，佢哋嘅壓場感真係大派用場㗎。
歐冠盃就好似一個大金礦，好多二、三線球隊都搏老命，希望分一杯羮，情況就好似一啲公司，特登做靚盤數，希望上到市咁。不過擴張過度，好易搞垮成間球會，遠嘅就有費倫天拿同切爾達，俾歐冠盃搞到降班。近嘅就有奧沙辛拿同赫斯，參加過歐冠盃外圍賽，都搞到係本土聯賽成績大跌。
拜仁今場對手莫斯科斯巴達，睇陣容就好似有心喺歐冠盃創一番功業咁款，中場仲有打過羅馬嘅阿倫尼切夫，外援名氣都唔弱，好似前鋒有「新巴廸斯圖達」卡雲拿基、打過阿仙奴嘅荷蘭前鋒奧胡素艾比耶，中場又有呢場停賽嘅烏克蘭國腳卡里連真高，甚至打過里賈納嘅巴西外援莫薩治，仲有一大班捷克、奧地利、波蘭同羅馬尼亞外援，講吓講吓，點解好似介紹緊聯合國部隊咁，隊友間用咩言語溝通都好令人懷疑，本身球隊歐洲賽經驗唔多，今次作客拜仁睇嚟都係會畀啤酒浸死。
不過拜仁就好似英超車路士咁，論盤路好少益到捧場客，好多時贏一球就收手，𠵱家拜仁個主勝只係1.4倍，折算亞洲盤就讓一球/球半，隨時贏波輸盤，今次推介單W外，不如冷敲一吓讓球主客和「和局」。
安德列治贏唔到里爾
如果用股市嚟比喻歐冠盃，比利時嘅安德列治好似一啲仙股咁，應該被剔除股市中；比利時係歐洲水平，已經由十年前嘅一線尾，跌到去三線頭。安德列治到今時今日，仲要靠麥保梅賓沙、高亞等過氣國腳，最當打嘅高柏尼又放走埋。安德列治更羞家到，連輸12場歐冠盃分組賽，上屆分組賽最後一場，先贏同樣出局嘅貝廸斯，攞番啲尾彩。安德列治今周主場對法甲嘅里爾，莊家開出平手盤，已經對佢哋冇咩信心，不過里爾識守唔識攻，作客又唔係好勁，倒不如博個和波，各得1分都有着數。