舊年911冇事，因為冇市，912就升咗34點。今年911就大跌，大藍籌同國企都齊齊向下走，恒指萬七大關失守，收16948，大跌197點，期指跌得仲多，低水43點。
現時市勢轉弱，小雙頂嘅壓力確會令人有好大憂慮，希望16871嘅前低位同50日線（16885）可以守得住。不過，唔玩期指、唔玩大藍籌，仲有好多股好玩。噚日雖係大跌市，但上升股（唔計認股證）仲有280多隻，短炒一樣有好多目標。
內地房產股個勢愈來愈強，中國海外（688）終於衝破6元大關，收6.02元，創出97年後新高。中海係龍頭股，有佢帶領，其他股接力而上，應該冇問題。越秀投資（123）收1.56元，升2仙，今個禮拜五宣布中期，只要唔係太差，呢隻大落後股，應該會發力了。
越投同今年高位比較，仲低成20%，大行㩒實收貨，已收咗好耐日子，𠵱家等時機成熟，就會發力上衝。
創富生物（340）震完倉，買家又魚貫入場，由頭到尾，採取主動，結果搶上1.38元高收，升番13.1%，成交有1.36億股，咁樣買法，市面貨源相信好快可以收亁。震倉之前，高位1.53元，今次整固完再上，一衝破呢個位，上升目標就指向2字頭。
快有大動作
益安國際（082）個勢愈來愈靚，噚日在大跌市中逆流而上，收0.92元，升5仙，呢間公司轉緊型，前景有得憧憬，股價更會先行一步。
益安由低位回升，最近呢兩個月，兩度上見0.94元就掉頭調整，今次再上衝，係第3次，由於成交大增，MACD亦快出現「牛牛」入貨訊號，相信破位而上機會甚大，睇幾多？照度上去，目標係1.26元。
益安轉營中國電訊媒體業，合作夥伴第一視頻已擁有多個經營牌照，要發展成為中國最具影響力的綜合性視頻分銷平台，並會與騰訊（700）及搜狐力爭電訊增值業嘅龍頭地位。益安開完股東大會後，相信就會有大動作。
郭兆誠