向來係網友公敵嘅欣宜，上年喺《兒歌金曲頒獎禮》度扮公主兼錫錫吳卓羲，結果搞到廣管局收到300幾個投訴，之後睇番收視報告，原來個節目平均有19點收視（約124萬人收看），點知去到嗰part就得番17點（約111萬人收看）。
《逃》收視創新高
向劉家昌拜師學藝嘅欣宜日前再度出擊，喺無綫嘅《星光熠熠耀保良》同向華強個仔向左合唱劉老師新歌《一切來自愛》，為籌款演出打頭陣。節目播出之後，欣宜又俾班網友狂踩，收視方面都麻麻，《保良》成晚嘅收視平均係23點（約有148萬人次收看），成晚最低收視就係欣宜開場唱歌嗰部份，只得21點（約有135萬人次收看），而郭富城嘅壓軸演出就錄得全晚最高收視，有25點（約161萬人次收看），單睇賬面，欣宜今次足足令無綫流失咗26萬觀眾。不過廣管局到目前為止都未收過投訴，對欣宜嚟講冇投訴當然係好消息啦！
另外，無綫早前買入美國高收視連續劇《逃》（PrisonBreak），上周二晚播出第一集，成績好勁，成為近年明珠台最高收視連續劇，錄得平均有27萬人次收睇。
