九巴系嘅路訊通噚日公布中期業績，純利升三倍。雖然，賺二千零萬對九巴以至於新地係濕濕碎，但路訊通就算現時股價得七毫三，市值都有七億三，對於一間「衍生」公司，的確為股東創造價值。記得佢分拆之時，九巴股價好強，大家都好開心。
巴士業競爭激烈，本港人口又冇增長，車愈來愈多愈塞，搭車嘅就唔多。陳祖澤做董事長雖然多計，但睇九巴呢個檔都唔容易，想加價就更加俾人鬧死。
一個傳統而冇增長嘅行業，一係向外地擴張，一係搞第二瓣。咁九巴咁多乘客，日日要搭車，只要裝部電視機，所費無幾，就可以「迫」佢哋睇廣告，成就一盤生意。之後養大佢、分拆上市、送股畀股東、刺激公司股價，九巴小股東都應該好清楚。
盤生意停滯不前，好睇主事人點應變，高手低手結果完全唔同。馬會近年搵唔到人入場，賽馬場生意連年冇增長，但佢哋搵到個新主席陳祖澤，你估除咗賭波之外，佢又有咩奇招？