喺旺角蒲開嘅阿偉（儍豹），唔見手機頻率多達5、6次，但提到半年前唔見W800i嗰次，佢就最㷫！「講起火都嚟呀！錢事小，飛屎事大！」件事發生冇幾耐，女友阿欣即時投訴：「你係咪將我啲電話號碼畀咗人呀？每日都有個話識你嘅朋友，打嚟講大堆無聊嘢，好滋擾呀！」經歷一次失機事件後，儍豹已經學精咗，將手機由軟件到硬件均加入一級Protect，事關佢本身最鍾意同女友猛拍合照，甚至親熱照，落重保護後佢仲狂言話：相照影、機照鎖！
記者：陳國輝
攝影：黃子偉、陳國輝
其實儍豹失機被滋擾事件只係冰山一角，仲記得前幾日嘅港聞頭條，娛樂圈一名女藝人因藏有裸照嘅手機被地盤工人執到，於是向佢勒索，令到「A小姐事件」轟動全港；雖然呢單Case喺法庭已經定晒案，但問題係現時絕大部份手機玩家，究竟有幾多人會用密碼鎖機呢？就算「藏春手機」事件完咗，難保好快又會出現第二宗、第三宗同類事件。今次儍豹企出嚟講經歷，就係要話畀大家聽，做足安全措施，冇有怕！
真實個案：肉麻SMS俾人昅晒
儍豹對於唔見手機引嚟麻煩嘅朋友，只能深表同情。佢任職於港島一間手機店做Sales，對手機保安問題，算係幾精通，「其實我一直都語重心長咁同熟客講，建議佢哋啱啱新機落地，最好先加個密碼Block住，咪掛住玩MP3鈴聲、Wallpaper住，事關就算唔見咗手機，入面嘅電話號碼、相片、重要SMS都冇咁易外洩嘛！」點知，建議者都有中招嘅一日，而且手機早已落足基本Protect工夫，點解仲會俾人解到密碼鎖，睇晒裏面啲資料，仲要滋擾到女朋友呢？只好埋怨執到機條友太過無聊喇！
抄入電腦即Delete
慶幸嗰次儍豹損失唔算好嚴重，唔似得A小姐咁，有裸照俾人勒索，搞到要報警上頭條！「上次唔見咗嗰部係W800i，雖然入面冇『珍藏』，但係有好多我同女朋友嘅合照，好珍貴，仲有唔少肉麻SMS㖭，俾人昅晒個心梗係唔舒服啦！」經過今次教訓，儍豹對手機保安加倍小心，仲講明唔會Save資料落手機，最多只係儲落卡，然後每次返到屋企再搬移至PC。「可能保安分唇一直Hit唔起，如早兩年嗰款指紋驗證手機，仲有一部帶追蹤功能嘅國產機，當SIM卡俾人拆出嚟，就會發出警報。但都係嗰句，道高一尺魔高一丈，都係自己昅住部手機最緊要！」
軟件上鎖三級制
唔好忘記儍豹都係一個手機Sales，佢唔單只以受害人身份講述經過，仲順帶建議各位採用以下3種方法，嚟強化自己部手機嘅保安功能㖭！
第一級：密碼即鎖最簡單
查實絕大部份手機都內置密碼上鎖功能，即係只須輸入一組4位數字嚟啓動手機Keypad，用法簡單，就算手機不幸俾人執咗，資料都唔會咁容易被發現。
StepbyStep
第二級：遙遠控制事後補鑊
現時呢項功能多數出現於Smartphone或者PDAPhone呢類高階機，你可以直接用SMS作為密碼，當你唔見咗呢部機，可立即SendSMS遙遠Lock死部手機。
StepbyStep
第三級：軟件加密最穩陣
嫌以上玩法都仲未夠喉，以下再介紹多3款收費軟件俾你，由上網單撈、安裝等過程都好簡單！
1.《MobileEdgeDeviceSecurity》
佢除咗提供密碼鎖機之外，更可以將照片、文件等資料獨立加密，真係要拆解所有檔案都花唔少時間，保安程度極高。
網址：www.trustdigital.com
2.《PhoneSecure》
專為S60手機而設，過癮在當盜竊者用緊你部手機，佢會靜靜雞Send對方個電話號碼畀你。
網址：www.wildpalm.co.uk/
3.《AdvancedDeviceLocksforUIQ》
學足PDA咁，同樣可以選擇某啲重要電話、影片之類嘅資料，設為單一個別保密，專用於UIQ平台。
網址：my-symbian.com/main/
冇嘢係解唔到！
究竟手機保安能否畀用家信心？會唔會輕易就一擊即破？小記就呢件事向改機專門店謝利記查詢過。店長Jerry解釋，手機密碼鎖確實可以令到一般人無法盜用，不過要解除呢個警報，實情仲有其他辦法！佢話，現時最勁嘅改機技術就係俄羅斯以及羅馬尼亞，唔少改機佬用緊一部叫「Div」嘅硬件，佢可以修理手機Software之外，仲能夠破解鎖機密碼；佢補充話，不過「Div」嘅用途都只係為改機而設啫，一般係唔會用嚟揭人私隱嘅！
放機前切記Reset手機
講起手機保安，雖然坊間提供唔少有用軟件，但始終冇絕對方法能保證資料不被破解！講到底，最可靠都係機主保持警覺性。除咗不幸遺失手機外，有時更因為放售手機時忘記刪除資料，導致私隱外洩。有手機Sales就建議大家，當你打算拎部手機去TradeIn或者放機嗰陣，記得預先將裏面嘅資料重新Reset過，再Check一次確保無誤，然後先好搵收機佬交易，咁至最安全！
