早兩日上網周圍蕩，點知去到《HKiTalk.Net》嗰陣見到有個叫做「〔轉載片段〕前城巴Megabus連拖卡倒後泊車」嘅Topic，初頭諗住係咪啲巴士迷用部玩具巴士拍出嚟嘅片。哈，點知Click入去睇，先知原來外國有位叫做nls81嘅網友，拍低咗一部英國MegaBus公司嘅雙層巴士，車尾掛住拖卡喺度學倒後泊車！
雖然呢條長3分08秒嘅短片質素唔太高，兼且只係影住個車尾，但都睇得好過癮，睇住個司機左扭右扭，搞咗好耐都搞唔掂車尾嗰個行李拖卡；要連拖卡帶巴士泊入用雪糕筒畫定嘅車位喎，你估易㗎？車尾又乜都睇唔到，仲難揸過貨櫃車呀！唔怪得網友CarlisleCockney喺Youtube留言，話呢件根本係一件好難做嘅事，呢位司機到最後都可以泊得到部車，實在令人佩服；而網友DD2113都話：「原來都幾難！個拖卡好易左篩右篩。」唔知日後喺香港考巴士牌嗰陣，使唔使車尾又要加個拖卡呢？
記者：鄭達基
討論網址： http://www.hkitalk.net/HKiTalk2/viewthread.php?tid=134035&extra=page%3D1
片段網址： http://www.youtube.com/watch?v=mwJpE0ax61I
