𠵱家商場搞活動幾乎變成例牌菜，信和大角嘴奧海城上個禮拜五搞嘅「中國古哺乳動物化石大展」，至禮拜日人流已達77萬，比舊年同期升咗33%，單係禮拜日就有成30萬人。預計呢個為期40日嘅展覽，可吸引700萬至750萬人流。
商場人流勁升，咁商戶啲生意又點呢？信和物業管理總經理蘇蔡潔蓮話梗係有得升啦，呢3日食肆生意額平均升咗四成，好似波仔飯負責人話，9月10號單日生意額升咗五成，係開業兩年半以嚟最高；金牌美食坊經理就話，3日營業額多咗45至50%。
美容用品專門店MEKA負責人都話生意額多咗五成；不過，賣潮流服飾嘅HARDWARE就只升得8至10%，冇搵得咁多。蘇蔡潔蓮透露生意最好原來係機動遊戲區嘅動感飛船，足足升咗六、七成。