樓市是否好景，除了參考樓宇買賣數字及樓價水平等數據外，業內人士的心聲亦是重要一環。《XocatII討論區》上，有關建築界的討論小區內，有網友chk888提出一個問題：「我想問𠵱家讀測量有冇前途？會唔會已經飽和？」
隨即帶來70多個回應，率先回應的網友中年地盤佬話：「傳統行業中，建築業係比較穩定㗎，因為唔會好似製造業咁搬上大陸，香港地少人多，要不停咁起樓，而且通常樓宇壽命是50年，大把舊樓要拆卸重建，𠵱家比較淡靜是因為97年之前谷得太盡，遲啲等啲樓賣緊啲就會轉旺，一於讀QuantitySurveying啦。」
ttfung1網友卻撥冷水話：「都唔係架……有啲兄弟做完一個地盆之後都停哂冇野做，除非去馬交」Garfield網友立即回應話：「快啲過黎啦……呢樹好等人用喎……大部份人都係租屋住，有啲住珠海拱北，平啲……」
不過，版主vegawong就話：「我上年都喺馬交做過單賭廳裝修，做完一單就怕怕。」據他解釋，全因澳門工友的「烏龜進度」，而Garfield亦認同，話「呢樹嘅文化就係咁。」可能正是工作效率的差異，勤力慣的香港工人，過大海開工的機會甚多。
過境搵食人數無統計
記者聽香港測量師學會副會長陳旭明講，香港呢幾年起樓真係少咗好多，唔少建築公司都過咗澳門，帶挈唔少會員都走咗去澳門搵食，但該會暫時未有一項正規調查，究竟有幾人過咗嗰邊。
測量師學會截至今年7月27日止，會員達6782人，其中正式會員佔4256人。
報料電郵：[email protected]