歐冠盃終於開波啦！最高水平嘅比賽，一場也不能少！G14隊隊粒粒巨星，贏波牌面高，不過，大家絕對唔可以睇小東歐波嘅實力！
今屆歐冠盃分組賽，係擴展到32支球隊以來，最多東歐波參賽嘅一屆。數字上，13隊打入第3圈外圍賽，接近有一半，即係6隊能夠殺入分組賽。睇來睇去都係G14玩晒，足球變得毫無新意，好在今屆多番啲新面孔，隨時有驚喜㗎！
講番歐冠盃A組，車仔並唔易踢，今晚主場對住雲達不來梅，客隊有近況十分好嘅高路斯同曉高艾美達，中場有廸亞高，分工好清楚！
睇番我隊愛隊，我只寄望有波歷克嘅加盟，可以幫到隊波。但係老實講，車仔到底可唔可以次名出線，我都實在有啲擔心！不過無論如何，點都要支持車仔小勝而回啦！
瞓身支持阿仙奴
另外，我瞓身支持阿仙奴，呢隊波聯賽仲未開齋，星期六主場迫和米堡更係一絕！阿仙奴會唔會係留力歐冠盃呢？因為亨利好想捧歐冠盃，上屆得亞軍，今屆一定報仇，所以會用全部心力去踢歐冠盃，本土聯賽成績無所謂。（以上純屬本人發夢猜想，但應該極可信）我支持兵工廠贏漢堡！
周鵬
雷霆881商業一台《球迷集中贏》主持
電郵：[email protected]