分店遍布港九新界連機場都有嘅大家樂，不經不覺已經20歲，主席陳裕光由84年開始入咗大家樂，可以講睇住呢間快餐店成長，由幾間舖發展到𠵱家125間。
陳裕光話，86年大家樂啱啱上市嗰時，股價得1.18元，20年後，已經升咗逾10倍，到噚日報12.3元。佢話記得當年，大家樂同𠵱家由3歲到80歲都識嘅國泰航空一齊上市，嗰時國泰上市價3.88元，生生發發，股價升到𠵱家都算發，噚日報14.6元，計番條數，20年都係升咗5倍咋。
佢仲笑笑口話，當年冇咩基金公司識得大家樂，睇到佢哋個英文名CafedeCoral，仲以為係同發音差唔多嘅CathayPacific有關。所以佢幾自豪咁話，作為土生土長嘅飲食機構，做到呢個成績都算唔錯，證明有心做就一定有成果，𠵱家佢哋積極衝出香港，北望神州，希望喺內地同洋鬼子快餐廳肯德基同麥記鬥一鬥。
地頭蟲打贏老麥
現時全球只有兩個地區嘅快餐店，喺自己嘅市場可以打贏麥當勞，唔知大家估唔估到呢？除咗菲律賓嘅祖樂比（Jollibee），另外一家咪就係大家樂囉。
李華華
[email protected]