人稱蝦叔的資深藝人關海山昨日去世，圈中人接獲噩耗均惋惜不已，曾與蝦叔先後結片緣的巨星周潤發和周星馳均大讚這位前輩平易近人，願意提攜後輩，他的離世實在是娛樂界的損失。
周星馳：佢演技好
79年與蝦叔合作無綫劇集《網中人》的周潤發，在他眼中的這位長輩十分隨和，他說：「蝦叔對後輩好照顧，演技又好，以前我啱啱出頭同呢位老戲骨合作，佢好肯同後輩分享自己嘅演戲心得。佢嘅離開，肯定係娛樂圈嘅損失。」
身在寧波趕戲的周星馳89年與蝦叔合作劇集《他來自江湖》，他說：「蝦叔好平易近人，演技好到冇得頂，對後輩又肯提攜，為人又風趣，佢嘅離開，真係令人惋惜！」
正在北京工作的吳孟達獲悉恩師死訊，感到十分難過，他昨日接受港台訪問時說：「我好鍾意睇師傅嘅戲，當年我一直喺佢背後偷師，又同師傅請教咗好多關於表演嘅方法，佢嘅表演方法好全面，佢嘅方法係最緊要多啲人生經驗，今時今日我仲有得撈，蝦叔對我嘅幫助好大。」吳孟達表示最後一次見蝦叔是年初，當時他還很精神。對於亡師的訓誨，吳孟達銘記於心，他說：「佢成日有一句說話係『人係要靠自己，用心機』，我𠵱家都有記住。」
本報記者