美股上個禮拜五造好，港股個圖又靚，大成交支持一個破腳穿頭嘅走勢，睇嚟昨日早段恒指抽上去冇乜走雞，點知日股唔生性，玩大插插，港股班好友雖然頂得住，但係「㗎仔」個市中午再插多100點，搞到港股晏晝個市散晒，恒指跌過200幾點，收市反彈都冇乜力，最後恒指都唔見咗197點，𠵱家市場嘅氣氛轉番淡，條50日線升到上嚟16885，班好友睇嚟會力守這條中期平均線，如果守得住，港股會轉為窄幅爭持，但係成交咁大，就算係窄幅爭持都會好激烈。
昨日滙控（005）一路都企得好硬，收市嘅跌幅唔算大，𠵱家企喺50日線水平，隻中移動（941）就黐實條20日線，個市頂唔頂得住，要睇兩大成份股嘅表現。
中海C輪3662：個市沽壓大，跌幅亦大，有成交又有上升氣勢嘅股份唔多，昨日走勢較好嘅股份，仍然係近幾日表現強勢嘅國內地產股，睇嚟這個浪仲未炒完。隻中海（688）升咗3日，昨日依然好醒，再升2.5%，報收6.02元，成交在跌市中縮咗啲，但仲係好活躍，應該會推去7蚊嗰頭。隻C輪3662昨收66仙，仲有46日命，8.64%價內，溢價2.3%合理，槓桿率9.1倍（有效6.8倍），街貨只有1.9%，到期前俾莊家買番轉頭嘅機會細，短炒有得諗，現價買，先睇正股升上6.45元，隻輪睇1蚊，正股跌穿5.80元止蝕。
另一中海公司輪580，有效槓桿率只有3.2倍，勝在成交大，好炒啲，都可以諗，正股升上6.45元，隻輪睇2.10元，止蝕參考同3662一樣。
俊樺