煲呔做完一輪諮詢騷，搞埋壇十一五，可以開始閉關做佢第二份施政報告，呢份報告都好重要，既總結佢過去一年嘅功績，又前瞻未來嘅藍圖，雖然話就話要選過先有得連任，但係人都知佢贏梗，分分鐘一提名就定江山，對手連一百票都冇，想入場角力都唔得。
八方聽聞，踏入9月，中方陣營又四出收料，由北京至深圳，各路人馬又嚟晒香港聽取港人對煲呔意見，飲茶灌水少不了，啲有頭有面嘅人更加唔得閒。要打煲呔小報告，就在此時，唔怪得特區政府咁緊張啲民望，因為民望呢一樣係煲呔唯一賣點。
所以煲呔日日笑面迎人，盡量扮演一個愛民如子嘅領導，但係點都有人唔高興，一個講法係佢權力太集中，處處都安插自己人，簡直係AlltheCE'smen，令中央擔心，所以話要挫吓佢銳氣，等佢不至功高蓋主，將來個公務員黨坐大，就冇法收拾。嗱，真係神又係佢，鬼又係佢，叫你強政，唔等於目中冇阿爺。
所以八方都開始為鬍鬚仔曾俊華擔心，雖然煲呔好想向北京力薦佢接肥龍個位做CS，即係政務司司長，而聽講鬍鬚曾亦唔介意更上層樓，輔助煲呔完成鴻圖大計，但問題係「雙曾配」真係有啲令北京唔安樂，萬一……萬一乜嘢都好，阿爺如何制衡曾蔭權呢？佢嘅嫡系一定唔會反佢。
如果呢陣冷風係真嘅，咁鬍鬚仔分分鐘冇行做特區No.2，叫佢做番特首辦主任跟出跟入實在大才小用，煲呔都要諗吓點搞，何況世事常變，呢刻鐘肥龍死都唔肯再坐一會，點知北京大曾叫到會唔會改變初衷？如果肥龍堅持，而唐唐唔係公務員出身，坐CS個位有好大難度，佢唔知敢唔敢接受挑戰，所以都唔好講死一定唔會出現「雙曾配」，事關輪功行賞，添馬艦大比數喺立法會獲得通過，阿John（曾俊華英文名）都功不可沒。