今周中歐洲盃賽全面開打，捉「鬼盤」亦向開足幾十場波盤嘅歐協盃賽事埋手。4支牌面似乎有唔錯優勢嘅球隊，包括蘇超聯雙雄赫斯及格拉斯哥流浪，以及葡超聯布拉加，學人讓波咪信；西甲聯奧沙辛拿對住土耳其球隊，唔使讓波亦忌捧。
赫斯及格拉斯哥流浪兩支蘇超聯球隊，喺今輪歐協盃首回合分別主、客場出擊。由於各自對手都非公眾所熟悉嘅主流球隊，相信赫、格兩軍有一定孭飛能力。雖然初盤見兩軍同時少讓平/半，但到訪赫斯嘅對手布拉格斯巴達，係捷克傳統勁旅，淨係連續多年喺歐冠盃及歐協盃嘅比賽經驗，赫斯已經望塵莫及。
布拉加點讓意甲隊
作客去到挪威同莫廸交手嘅格流，其實今季換咗由法國籍領隊拿古恩執教後，表現唔算好好，太過倚靠前鋒基斯保廸及柏素表現搶分，打歐洲賽仲要作客，淨係靠名氣讓波唔掂嘅。
葡萄牙球隊近年喺歐洲賽表現愈嚟愈好，但似乎只限波圖、士砵亭及賓菲加3支傳統勁旅。今輪主隊布拉加，是役對手係來自意甲聯嘅基爾禾，意大利球隊向來愈被睇淡愈有料到，少讓平/半嘅上盤忌捧。
今輪作客特拉布宗嘅奧沙辛拿，今季表現跌緊；而且土耳其球隊向來有主場威力，奧沙辛拿今仗唔使讓波，都唔好沾手。文：華度