呢個禮拜北京好熱鬧，事關立法會兩大政黨排隊上京。噚日民建聯一行30多人大隊就喺晚黑抵埗。既然都入夜，當然冇公開活動，團友大可以沖個涼瞓個靚覺，準備嚟緊兩日嘅緊密行程，包括同環保局、稅務局同商務部等多個政府部門，講吓兩地可以點樣交流合作。
今次民建聯上京前真係做足功課，事關佢哋會向港澳辦，提供一份題為「香港與內地進一步加強合作」、足足有成28項建議嘅報告，內容大概除咗回顧兩地過去多年嘅合作情況外，都有提出新嘅合作方式。呢份見面禮認真唔講得笑，港澳辦睇怕有排睇。
自由黨大隊都唔執輸，喺星期三就會殺到北京，接力拜訪各大團體。今次訪京潮最大特色，係至今冇一個政黨話會被安排同領導人見面。最終會唔會又偷偷哋密會？咁就要密切留意呢幾日發展喇。