周末，孫柏文喺尖沙嘴某間酒吧，撞到一位對政治非常留意嘅朋友，佢好崇洋，所以叫自己做Rapiere。見親佢都一定講吓政治嘢，指定動作，冇辦法。開始時，佢解釋呢排特區祖國政治圈發生緊嘅事，不過，唔知道係唔係我用咗太多乙醇呢隻精神科藥物，所以聽來聽去，都聽唔入腦。Rapiere見到我好似唔聽佢講，開始有少少勞氣，同我講：「你班財經口水佬，真係唔用你哋嘅術語，你哋就聽唔到嘢入腦。」
我答：「哈、哈！我哋呢班財經口水佬嘅術語，值錢㗎。你估你話學就學，咁容易咩？」我一講完，我就見佢擺出一副財經新聞主播嘅樣，跟住好似鬼上身一樣，就講：
「自從早前情報市場爆出有『資深記者』出售國家機密只值30萬嘅消息，『祖國情報』股價應聲下挫，連帶同系其他幾隻情報概念股，包括『留美太子黨』、『長江河口幫』、『公安國安』，股價亦同時下挫，分析員指有關公司都係從事出售情報業務，今次『祖國情報』自揭機密交易金額之低，遠遠低於市場預期，而且較去年該公司官方公布，交易額可能達幾百萬，相差逾十倍，據知監管機構正擬調查『祖國情報』大股東，『北京共慘集團』是否有篤數之嫌，刻意製造交易，增加政治犯數目，令旗下專從事政治犯換取外國利益的子公司『秦城度假村』，增加盈利。
「不過亦有分析員稱：『祖國機密』情報遍地皆是，連公司董事用多少格廁紙也屬情報，估計今次涉及情報價值有限，甚至並非情報，所以不能作準，而『留美太子黨』、『長江河口城幫』從事出售高價值情報業務，而且長期有『JamesBond特務』、『特區富豪』這些大公司定單支持，所以建議投資者可小注怡情，趁低吸納，博低位反彈。
「不過亦有分析員提醒散戶，母公司『祖國機密』大股東『北京共慘集團』明年更換管理層，再加上新舊董事局高層近日明爭暗鬥，可能影響未來業績，建議見好就收，切忌長?！」
沽之而後快
講到呢度，我已經拍案叫絕，笑到碌地，不過都係忍唔住挑釁佢：「做財經口水佬係要冒住被叫「山埃組組長」嘅風險，畀貼士啲投資者，你做唔做得到？」Rapiere又再次主播上身：
「貼士：建議沽『特區政府』（1997），因為董事局快改選，現任主席為求連任，必定向800個有投票權股東大派特別股息，犧牲其他700萬股東利益，沽之而後快！民主概念股方面，『民主白鴿」（1994）股價近日反彈，但相信屬虛火，不宜沾手，反而睇好『公文袋』（2006），雖然管理層死牛一邊頸，但管治文化較『民主白鴿』佳，宜長揸，至於10月1日掛牌上市嘅『民主丐幫LSD』（LeagueofSovietDilettantes），恐認購不足，勸股民不宜入紙抽新股。」
Rapiere真係一個高人！小弟甘拜下風。
孫柏文