機場管理局行政總裁彭定中將離職，但一直未有確定時間，而佢嘅繼任人選亦未有定案，聽講，以主席馮國經為首嘅繼任人遴選委員會已經做緊嘢，全球物色人選，完成所有程序後就向煲呔提名，然後任命，所以彭博士暫時仍然要捱世界，等到接班人先至可以鬆人做新工或者退休。
八方問彭博士有乜打算，佢就反問有乜好介紹？八方隨口噏：「不如服務社會啦」，佢就即刻拍拍八方膊頭笑住話：「遵照你的建議」。其實佢真係幾nice，喺噚日中午嘅「世界航空城市會議及展覽會」記者會中，棟篤企咗成45分鐘，回答十幾廿條問題，八方一直見佢笑面盈盈，有問必答，直至答到約30分鐘，可能因為企到腳仔軟，又好似未食飯，所以要用手撐住張枱挨住借力，但仍然好詳盡咁答問題，真係好難得。
彭博士仲話，機管局同珠海機場嘅合作已經進入最後準備階段，預計雙方合組嘅管理公司幾個月內可以正式營運；而入股杭州機場一事已獲發改委批准，仍待商務部發牌，另外佢亦希望珠三角區內各機場能夠成一個體系，而珠海就只係一個開始。