馬季昨日開鑼，唔單止馬迷興奮，特區高官亦好興奮，在沙田暢敍一堂。咁前教育統籌司陳祖澤做咗新主席，又請到特首煲呔老人家嚟敲鑼，兩位司長肥龍許同唐唐當然要與眾同樂，雙雙「出馬」捧場；連經濟發展勞工局局長大蛇葉都唔執輸，放隻「得勝非凡」落去第六場陪跑。咁又係，馬會年年交咁多稅請咁多人，又真係同經濟發展及勞工好有關係。
八方在場中除咗見到上述高官嘻嘻哈哈，仲見到去咗京城做特區駐京辦公室阿頭嘅曹萬泰。咦點解咁遠水路都入場呢？哦，馬會在北京建設新會所，計劃吸引中國嘅達官貴人做會員，等中港兩地真正「雙邊投注」。目下會所工程如火如荼，日後北京馬會同香港馬會關係一如兄弟手足，咁駐京辦又點可以唔做定啲功課呢！
高官大聚集咁高興，佢哋啲馬有冇幫馬迷執番多少呢？對唔住，雖然兩司一局都有馬出賽，但表現認真一般，最叻都只係唐唐隻「心福」跑第三；而肥龍嗰匹「有聲有色」只跑第十，同場大蛇葉隻「得勝非凡」就仲曳，慢過慢舦蛇，跑第十一。
八方冇金勞詹咁好彩，輸到冇晒癮離場，在停車場見到神童輝，佢竟然四萬咁口，問佢係咪贏好多，佢就擦自己鞋，話今季《蘋果馬經》新推出嘅「行行出馬神」，有唔錯水準交出，雖未至於中到開巷，但唔少冷馬都一樣貼中，例如特首盃嗰場，勝出馬「芙蓉鎮」就有成13倍，另外一啲冷馬「喜蓮戰略」及「佳景飛駒」都有位置交出。
入場慘過打仗
咁幾時都係信群眾智慧好過信高官，呢個道理都唔使神童輝教。不過睇番噚日嘅投注額，八方相信馬會高層都頭痕；而一眾同馬事有關者，亦真係好難唔擔心。
點解啲人唔賭馬呢？有人話去咗賭波，但係賭仔有得賭點會嫌多呢，賭完波都可以賭馬㗎。八方覺得最大原因係啲馬太難賭，而且賽期太密、場數太多，賭完一日簡直打完仗咁攰。入場已經由社交玩樂變成真正搏殺，所以派晒飛都冇用，都係得三萬零友。呢個問題，兩位新董事陳生利生，有冇咩好計仔搞搞佢呢？