呢個月尾，好多人去昆明，佢哋專誠去打幾場高球，因為昆明呢個時間最美，天氣好。更特別嘅係，去昆明為港澳辦前主任魯平預祝80大壽，一齊敍吓舊。
白頭佬魯平喺回歸前風頭一時無兩，因為香港問題全部都由佢同當時國務委員錢其琛拍板，八方仲記得魯主任鍾情於董建華，而招牌都改咗嘅新華社社長周南就力捧楊鐵樑；加埋吳光正同李福善，認真有睇頭，結果魯平一派勝出，本來係高興之事，可惜所託非人，老董表現令人沮喪，魯平自此都冇乜嘢好講，封嘴也罷。
直至近年，董去曾來，聽講魯主任都有啲微言，唔係咁鍾意煲呔，唔知係咪覺得佢太世界仔，抑或覺得佢同陳太都係港英餘孽，冇好好輔助過老董。不過，鍾唔鍾意都好，北京已經撐梗煲呔，魯平不如慳番啖氣，慶祝吓自己80古來稀仲好啦。