喺我哋特區裏面，有好多人仲好懷念過去，就算特區裏面冇人話希望我哋仲係殖民地，我相信每一個香港人，某程度上都會諗吓：「如果香港仲係前宗主國統治，我哋會唔會好過啲？」我相信大家每人心裏都有自己條數，不過，孫柏文噚日就親身感受到，點解做特區好過殖民地。
噚日，孫柏文就有要事在身需要出國，所以去咗赤鱲角機場。上機前，我就走去滿足我喺花旗國讀書時，逐漸養成嘅習慣。就係食番個BurgerKingWhopper漢堡包，同埋需要飲一杯加大大碼嘅汽水。當然，咁大杯汽水，好難一次過飲晒，平時我會攞上機慢慢飲。
不過，今次我唔清楚可唔可以照做，所以就大大口吸汽水。正當我吸啲冰凍汽水吸到面青口唇白，有少少頭痛嘅時候，同我一齊出國嘅朋友就問：「你好口渴呀？飲汽水飲到面青青。」我話怕唔可以攞上機，所以飲得咁快，佢大笑：「唔係去英國或美國嘅飛機，係可以攞水上機㗎！」
就喺嗰一刻我開始諗，有份打反恐戰爭嘅國家，佢哋啲領導人成日都話反恐同恐怖襲擊嘅戰線，係好長同冇定形。試問，如果我哋仲係前宗主國嘅殖民地，你估孫柏文可唔可以成個「大款」咁，攞住杯汽水上機？你話做特區係唔係好過做殖民地？特別係如果你有國泰、地鐵等等嘅股票，做特區好？定係做殖民地好？
911食煙救命
今日係911恐怖襲擊五周年，當年我仲喺花旗國。記得嗰朝9點幾差唔多10點，我跟足習慣開電視睇CNBC，諗住睇吓個市點。不過，我一睇個電視畫面，發覺下面兩條股票報價線，係報緊對上一日嘅收市價，而報價嘅顏色亦代表個市冇開。我就覺得奇怪，點解今日冇市？再睇吓個電視畫面，我見到好似現場直播「拆樓」鏡頭，我第一個反應係：「值得現場直播嘅拆樓鏡頭，唔通SteveWynn又喺拉斯維加斯拆舊賭場重建？」當然，過多一陣我就知道情況有幾嚴重。我相信大家仲記得第一次聽到呢個消息嘅時候，自己喺度做緊乜，真係一世難忘。
最後，番鬼佬成日都話運用笑聲、幽默，有治療「心靈創傷」嘅功用，今日我就同大家分享一個，幾年前我喺花旗國某個機場內，一間吸煙房聽過嘅故事。講故事嘅人，係一位老伯，我同佢傾偈，都係由「借火」開始。佢話曾經打過韓戰，親眼見過「人海戰術」嘅威力；又話自己來自紐約，對付恐怖分子，就好似打蘇聯為首嘅國際共產主義一樣，有排打，亦未必每場戰役都會贏，不過佢話有信心遲早可以贏。
咁講到911，佢話有個細姪喺世貿大樓返工。仲要喺每朝早股市開之前開例行會議。佢個細姪有食煙嘅壞習慣，日日都俾老婆叫戒煙，所以唔可以喺屋企食，返工先偷偷地食。不過因為辦公室全面禁煙，所以被迫喺開會之前，走落街食煙，日日如是。911嗰日，個細姪就企喺街，食緊煙，睇住第一部飛機撞入世貿大樓，佢一見到當然即刻走。老伯話，個細姪真係好彩，因為佢間公司最後死咗好多人，「smokingsavedhislife！」（食煙救咗佢條命）
咁我就問：「今時今日佢老婆仲有冇叫佢戒煙？」
老伯笑住答：「梗係有！」世界就係咁。
孫柏文