嘩，新款Mercedes-BenzS-Class真係勁，先前喺香港只係「賣車花」，但都已經賣咗幾百車，問你怕未。家陣開始逐步交車，但你又怕揸住佢出街撞口撞面都係咁嘅樣，咁不如加套ASMADESIGN提供嘅包圍，搞到部車好似加咗個大面罩咁，唔嚇得都睇得吖！
記者：鄭達基
EagleI包圍 好似加個大面罩
呢Set由ASMADESIGN專為S-Class而設嘅EagleI包圍，除咗最常見嘅Low低車身同加裝裙腳之外，我覺得成個Look最正都係佢嗰個加大碼鬼面罩，裝咗之後搞到部車好似戴咗劍擊比賽用嘅面罩一樣，睇落好型喎；咁仲唔止呀，原來ASMADESIGN仲喺部車嘅車尾位置加咗生風導入口，尾喉都換埋做Size較大嘅跑車款式，胎軨方面都有作出改動，換成自家設計嘅21吋款式，唔單止令操控表現變好，同時都可以令到部車個Look變得更有型。
車廂機械依舊 講豪Sell大力
雖然外觀有咁大改動，但原來車廂同機械配搭都跟原有嘅S-Class相近；車廂前後兩排座椅仍然係用高級真皮鑲嵌而成，同時又內設高級音響等豪華配備。至於機械配搭，最受歡迎嘅依然係S500所用嘅一台全新5.5公升V8引擎，馬力及扭力輸出可達388hp及530Nm，用以驅動此車可謂綽綽有餘。
