公司幾個男人講到女星手機裸照單嘢，眉飛色舞；女同事就愈聽愈驚，都話唔會畀男友影呢啲相，「結咗婚都會離婚啦，點知佢第日用張相嚟做咩。」講到唔見手機，阿清話佢有計，可以令得到手機嘅人，得物無所用。
佢話同有手機王之稱、新世紀科技國際公司董事陳克敏傾過，原來每部手機，都會有獨一無二嘅機身編號，即serialno.，只要喺手機輸入「*#06#」，螢幕就會出現呢個serialno.。q(-_-)
佢話，就算偷手機賊掉咗張simcard，網絡商都可以查到部機係邊，因為網絡商有一部特別追蹤器，憑手機嘅serialno.，可以追查到手機位置；仲可以遙控鎖機，令部機用唔到。佢話警方好耐以前已經同網絡商有聯繫，用呢個方法追查罪案。不過，佢話有啲機太舊，可能未必有呢個功能。(-_-)p
阿清講，陳生仲話有另一種方法追查手機位置，就係憑手機天線發射頻率，網絡商可以搵到手機身處邊幾個收發站之間，就可以搵到手機大約喺咩位置。
所以，阿清話平日最好先寫低個serialno.，唔見咗就同網絡商報失時講埋個no.。~(^_^)~
逄周一至周四刊出