又係九龍城，又食泰國菜，悶啫！浸大社會學系3年級生阿瑜都係咁話：「上年同幾個同學一齊夾份租住九龍城，九龍城最多泰國菜，起初都覺得好新鮮，但食耐咗真係好悶。」悶，就要搵新嘢食，佢最尾搵到「印度咖喱王」，「有晚經過見到呢間印度餐廳，咪入去試吓囉，我住喺九龍城1年，淨係見過呢一間印度餐廳咋。」
阿瑜帶路，嚟到一間唔太起眼嘅舖頭，點知一推開門，即刻俾裝修吸引，阿瑜話：「係呀，呢度裝修好靚，感覺高雅啲。」可惜客人唔多，問負責人Brian，先知餐廳已經開咗13年，以前好旺，𠵱家生意就少咗啲，「我成日介紹朋友嚟幫襯，我相信經過我極力推介，餐廳已經比以前旺番唔少。」咁都得？真係俾佢吹脹！畀啲位你Hardsell嘞，「呢度環境好，播柔和印度音樂，好有Feel；食物方面，我鍾意呢度嘅咖喱唔太油膩，比較適合香港人口味。」我都鍾意食印度咖喱，講真，呢度食物質素唔錯，職員服務態度又好，下次去九龍城，唔使淨係食泰國菜咁悶喇。
記者：黃若茵
攝影：陳偉強
咖喱比目魚頭$38
餐廳新出菜式，魚頭好大個，切開裏面勁好肉。咖喱辣度建議揀少辣至中辣，否則蓋過魚味就真係得個辣字喇。
香燒春雞$58
無呃你，我未試過喺印度餐廳食到咁滑嘅雞髀肉，滑得嚟仲要醃得好入味，明明已經覺得飽，都忍唔住係咁食。
瑪沙拉雞$52
阿瑜：「食印度菜一定唔少得瑪沙拉，味道香中帶甜，一路食喉嚨會慢慢感覺到辛辣味道，但唔太濃烈，怕辣嘅人都啱食。」
印度咖喱王（27165128）
地址：九龍城城南道24號地下
