一班賓架出現，近日嘅話題離唔開誰是「五十二歲銀行家范先生」，唔好話賓架八卦，當報紙大字標題講「銀行家情婦跳樓」，大家點都會有好奇心，互相問：「你識唔識呢位賓架范？」左丁山就收咗唔少如此電話，自己又打電話問人，哈，直至今日寫稿為止，冇料到喎。姓范嘅銀行家，有兩位幾出名，但佢哋都年近或超過六十歲，唔係五十二歲。報紙報道信唔信得過呢？有疑問。
既然唔識賓架范，大家就問誰是Ａ小姐（二十四歲）、Ｂ先生（二十二歲），更加考起，賓架根本與娛樂圈脫節，鬼知咩。既然唔知，賓架Ｗ話上星期三聽曾智華在「晨光第一線」講飲講食，講到食天九翅，甚為精彩，聽到佢心郁郁，想去試吓。曾智華係為食鬼，個個禮拜與尖嘴Ｆ到處搜尋平夾靚之本土色彩濃厚嘅美食，亦都跟中環蝴蝶去食高檔菜式，由佢講「為食團」，最有料到。
想落香港電台以後都係講飲講食，保重身體好過嘞，否則會有大棒扑落嚟。（今期《紫荊雜誌》（九月號）有專文討論「香港電台與特區政府的博弈」（第八至第十三頁）），發表三篇文章評論港台唔聽話，一位作者「黃海」指港台曾經係港英政府御用工具，在國家主權和領土完整問題上公開挑戰，係香港反對派的輿論重地（點名批評吳志森在《蘋果》、《明報》撰稿），另一位作者「田水」講到更露骨：「作為政府部門的港台反對政府並支持反對派，不能簡單以『新聞自由』為幌子免責。政治問題有時需要政治手段解決，如堅決撤換廣播處處長，責令港台清除主持人中的反對派分子及停播長期支持反對派的評論節目，嚴肅追究審計報告中涉及的港台違紀人員的責任，檢討甚至修訂與港台簽訂的所謂編輯獨立協定使之與政府部門角色相符……從今年七一前後，港台的表現看，港台仍是有恃無恐，決不會輕易向政府低頭……」，呢篇文章殺氣騰騰，連新上任嘅副處長傅小慧都掃埋，所以話呢，港台以後專門講飲講食就最好，搵曾慶紅、曾蔭權、曾鈺成、曾俊華嘅宗親曾智華做處長啦！