新碟推介：周慧敏不老的傳說

闊別紅館12年，Vivian今年5月重踏舞台開演唱會，佢拎起支咪，唱腔絕不比舊時遜色，最緊要仲係依然咁靚，兼且唱足全場都有氣有力，一啲都唔覺佢老！今次推出《BackForLove2006演唱會》DVD版，當然落齊晒Vivian唱Live嘅經典成名曲，例如《自作多情》、《天荒愛未老》以及《流言》，而且多年嚟嘅知心好友，好似古巨基、林子祥以及黃凱芹，更客串做埋表演嘉賓，同歌迷敍舊之餘，仲齊齊玩遊戲兼拖手仔合唱，場面夠晒溫馨熱鬧！
值得一提嘅係DVD封面包裝，外皮設計十足一本相簿咁精美，打開裏面仲收錄咗好多Vivian靚相，若然你都係玉女掌門人忠心Fans，最啱就攞嚟收藏！幕後花絮、綵排等例牌環節，喺BonusTracks當然唔少得，今次仲特別加插倪匡、倪震兩父子嘅訪問片段，最搞鬼連Vivian至愛嘅貓貓狗狗都粉墨登場。究竟仲有乜嘢睇？買番隻DVD返屋企咪知囉！
記者、攝影：陳國輝

■身上鋪滿碎石裝飾，連支咪都包到靚一靚。

■倪震扮公仔哄伊人嗰幕，相信Fans呢世都難忘。

查詢：DVDPro（23326326）
地址︰旺角奶路臣街6E德發商場B4舖

■嚴格嚟講，Vivian唔只係歌手，仲係才女，擅唱能彈。