家陣興講「十一．五」規劃，煲呔都唔執輸，特別喺今日911，搞咗個「十一．五與香港發展」經濟高峯會，對特區政府而言，擦吓中國計劃經濟鞋，以示接近國情，點都好過悼念美國嘅災難。但對習慣自由經濟嘅香港人嚟講，十一．五係乜唔會好多人知。
其實十一就係第十一個，五就係五年計劃，中共建政之初學蘇俄搞計劃，於是有第一個、第二個五年計劃，現在就係第十一個。大家可能會問點解啲年數唔啱嘅，好簡單，因為有段時間中國亂過亂世佳人，咪冇咗。
究竟今日壇嘢會講咩？原來都好多喎，例如喺基建方面，政府使唔使建立一個高層次嘅跨部門統籌協調機制呢？又例如香港點先可以發展成為區域教育樞紐？當局又點繼續推動CEPA，令更多中小企受惠等等。
聽到呢度，大家都應該覺得：嘩，真係大把嘢講，咪講到天黑？咁講真係冇錯，事關個論壇真係由朝開到晚，朝早9點由煲呔致開幕辭後，先由國家發展和改革委員會財政金融司司長徐林做簡介，之後就有分組討論。一點午宴過後又再繼續分組討論，傾到夜晚6點半，煲呔先做總結，咁仲唔係天光傾到天黑？不過，係咪天黑都唔緊要，最緊要與會者唔好口水多過茶，傾完都唔知傾咗啲乜就得喇。
李華華
[email protected]