近年時有發生因電髮引致皮膚受傷的爭拗，日前有讀者到髮型屋電髮，遭電髮水灼傷頭部皮膚，既感痛楚，更有脫髮迹象，事後她向髮型屋追討賠償，卻遭拖延。有法律界人士指，事主可透過法律途徑索償，包括當時的電髮費用、涉及醫療的總開支及傷痛費等。
陳小姐於八月下旬到尖沙嘴JustHairSalon電髮，卻發生意外。她說：「呢間髮型屋我幫襯咗成三年，點知今次再去電，就搞到傷晒。當時髮型師搵個助手同我落電髮水，落嘅份量已經唔啱，多到流落額頭！」
隨後，陳小姐感到皮膚有異樣：「繼續畀佢落電髮藥水，跟住就覺得頭頂皮膚有啲『㷫』同『拿』。之後畀佢哋上髮卷，再用部電髮器焗頭，部機開咗兩分鐘左右，個頭就冒煙，我即刻叫髮型師熄機，佢淨係話『冇乜嘢，忍多陣』，只係加個吹冷風嘅風筒降溫，然後繼續電。」
頭頂濕水即劇痛
「焗夠原定嘅20分鐘後，髮型師又話要加多10分鐘，即前後電咗半個鐘。沖水嗰陣，頭頂一濕水就好痛，髮型師揭開頭髮睇，就話『冇事，少少敏感啫，過一兩日就好』，咁我睇唔到，惟有信佢，到走嗰陣，髮型師仲叫收銀送番張護髮禮券畀我。」
陳小姐說：「電完髮後，個頭好唔舒服，成日痛，洗頭仲好似甩多咗頭髮。第三日對住塊鏡，撥開啲頭髮睇吓就嚇死，見到頭頂兩邊，各有一個五蚊銀大嘅紅色傷口，我即刻去睇皮膚專科，醫生話我俾電髮嘅化學藥水灼傷咗，要用藥水洗傷口，𠵱家成個幾禮拜都仲痛，最怕第日有乜後遺症，傷口生唔番啲頭髮就大件事！」
辯稱因敏感致傷
事後陳小姐要求有關髮型師負責，陳小姐說：「最初要佢賠醫藥費都唔肯，話淨係可以送護髮禮券，跟住又話只可以賠一次求診費，仲要遲多個零禮拜先畀錢！」
記者前往尖沙嘴JustHairSalon，找到為陳小姐電髮的髮型師Abe，當時她表示，只會負責陳小姐一次診治費，並指其傷口由敏感造成，可能與客人洗頭時過度用力致弄傷頭部皮膚有關。
其後，該店負責人則改說，店方願與陳小姐再作商討，在合理及能負擔的情況下，賠償其治療過程的費用，不以一次為限。
檔案編號：0901039
