俾23條搞到萬箭穿心嘅葉劉，當時就算受盡各種批評，都保持強悍作風，冇流過一滴眼淚。噚日佢上商台節目時，竟然打爛咗一向堅強嘅生招牌，喺鏡頭前喊得淒涼。人係會變嘅，尤其政治人。
有咩人可以令葉劉為佢流淚？都係得一個，就係佢個囡囡喇。葉太憶述當年忙於工作，冇乜時間理佢，一有機會梗係對囡囡千依萬就，結果愈縱愈唔聽話，成績更一路麻麻。葉太試過帶住囡囡去陳四萬官邸參加宴會，唔單止令到陳太唔高興；囡囡嘅表現，都令身邊好多朋友爆咗句「唔係好掂」。葉太聽到後既唔開心又內疚（佢噚日都係開始講到呢度時喊），的起心肝要同囡囡轉轉新環境。03年佢劈炮唔撈，同囡囡都好有關㗎。
揹住匯賢智庫主席身份嘅葉劉堅持無意再做問責官員，但08年立法會選舉就可以諗諗，唔知到時佢會唔會搵已經好乖嘅囡囡助選呢？