好淡大戶上個禮拜打咗場硬仗，淡友佔咗上風，不過好友都唔弱，投入大量子彈，頂住17000關。最後兩個交易日外圍市況氣氛麻麻，恒指都跌唔穿17000關，圖表仲出現「十字星」同「破腳穿頭」。好友只等一個機會進行大反擊，上個禮拜五美股顯著反彈，港股今日應該唔會放過大好機會炒上，早段恒指會升幾多，要睇吓日股個勢，不過，日經指數個圖擺明要抽高，加上美股走勢配合，日股今早大幅上升嘅機會唔細，如果真係咁樣，期指挾淡倉嘅力會加大，上周六介紹嘅恒指C輪會有睇頭，咁樣乜嘢股份會帶個市上去？滙控（005）連跌幾日，喺20日線企穩，成交大增，應該跌完，挾淡倉非滙控莫屬，可以吼啲滙控C輪。
滙控C輪3441：3441𠵱家個價54仙，槓桿率25.7倍（有效11.1倍），期限長，引伸波幅17.5%，正股上試140元（現價138.70元），隻輪應該見59仙，破位上試142元，3441有機會突破68仙，現價買番啲，上望68仙，正股低過137.80元止蝕。
中石化C輪4997：紐約期油跌穿68美元後進一步下試66美元，此個關若守唔住，期油隨時碌落去60美元，對中石化（386）有利。中石化調整3日後，已喺10日線企穩，今日應該會反彈，升破4.82元（現價4.76元），會再試5.10元。中石化C輪4997，現價42.5仙，槓桿率11.2倍（有效7.7倍），引伸波幅30.2%，對沖值0.7，正股上試5.10元，4997應該唔會低過68仙，現價買入，正股跌穿20日線止蝕。
俊 樺