喺DC年代令無數機迷瘋狂嘅《PSO》，眨吓眼就出咗六年，雖然隻Game本身存在住唔少問題，如數之不盡嘅出術方法同被「跌錢黨」屈走裝備之類，但無損佢「史上首款家用網絡RPG」嘅成功稱號。正統續篇《PSU》剛喺PS2同PC推出，當年《PSO》Fans全部蒲頭撐場，超過20萬人Online更導致廠方冧Server！文：陳福榮
首周銷量驚人
唔知係咪世嘉開發部低估咗隻Game會有咁多人玩，《PSU》甫推出不久即傳來噩耗，就係最靈魂嘅網絡模式因冧Server而被迫暫停！搞到原先可以即刻開波劈友儲Lv，變成一係齋玩故事模式、一係當OpenBeta頂住癮先（可能隨時冇晒Save）。好多擁躉簡直係成盆雪水照頭淋！全因隻Game已經Delay咗好多鑊，家下仲叫人等到10月先至有得正式玩，唔少機迷都唔想嘥成個月煲嘅狀態最終報廢收場！其實世嘉咁多年經驗，𠵱家仲有啲咁搞笑嘅嘢發生，真係想唔鬧佢趕客都唔得！
PS2版《PSU》首周銷量達15萬，保守估計PC版銷量一樣，已達30萬高位！再保守啲估計只有q人上網玩（PC版不可Offline玩），已超過20萬人Online組隊，廠方準備稍有不足，冧Server都唔奇！
狂熱Fans有嘢講
Tony：「原本同班Friend好有興致咁等佢推出，搞到連《FF3》都忍手唔玩住，點知𠵱家同人講冧Server冇得連線，唔通叫大家買返去單打成個月咩？唉，惟有粗粗哋當Beta玩住先，遲啲由頭嚟過啦！」
地圖加大唔局促
《PhantasyStarUniverse》（簡稱《PSU》）係世嘉自《PSO》後另一網絡ARPG力作，PS2版與PC版同步推出，因此唔少香港玩家都寧選後者而捨家用機，事關方便同戰友用鍵盤同咪溝通外，亦唔係咁多人部PS2都上到網，所以PC版能掀起搶購潮。講返隻Game，基於主機性能Upgrade，以往《PSO》做得唔好嘅地方，今次都徹徹底底咁搞番好，畫面同地圖面積係最明顯嘅改進，唔使再好似以前咁玩「房仔戰」！
增至6人上網組隊
世嘉喺04年E3率先披露咗條好正斗嘅CG影片，唔少機迷都以為佢係MegaDrive超正RPG《PhantasyStar4》嘅續篇。點之後嚟公布話出埋PC版，仲對應上網，Fans先如夢初醒，知佢係《PSO》嘅強化延續篇！可惜延期咗半年，唔少人等到熱情冷卻晒。
《PSU》來自《PSO》，唔少地方都跟到好足，譬如可自定角色高矮肥瘦，以及換唔同嘅衫，令每個玩家嘅造型都別具個性等。戰鬥方面亦係先入Lobby組隊，但今次由4人增至6人參戰，如果怕唔習慣，不妨先喺故事模式熟習一下。
以一敵百似《無雙》
以前《PSO》主要分埋身劈同遠距離射兩種，雖然做槍手邊走邊射穩陣啲，但唔少人嫌佢扣得少兼冇手感，所以寧願做打到開巷嘅肉搏戰士！今集《PSU》攻擊招式亦設計得異常華麗，尤其係拿起大劍周圍斬嘅劍氣，直頭拍得上《烙印戰士》咁激，以一敵眾嘅場面又有幾分似《無雙》，如果冇玩過《PSO》而又唔介意暫時得單打，又或過吓ARPG隨處斬嘅手癮，呢隻Game都不失為一個好選擇。
PROFILE
遊戲類型：ARPG
對應機種：PS2、PC
遊玩人數：1至6人
開發廠商：世嘉
售價：PS2版約$388
PC版約$420
售賣點：DreamStore
電話：25753285
地址：灣仔東方188商場G04、256號舖
佛山讚先生：
自《PSO》後真係餓咗好耐，廠方今次亦冇令人失望，由畫面到動作都畀到機迷唔少驚喜，最正仍然係一大堆任務模式，睇嚟呢半年都唔得閒！
百彈賤腦男：
唔係嘛？居然一開波死Server！堂堂世嘉居然咁失策，多次延期不特止，無錢就問SAMMY攞嘛，仲賴反應超出預期引致失預算，食唔起你又推咁多貨出街？
