年輕貌美經紀Karen：早晨謝太，Karen啊。我今日要介紹你買隻股票。不過，講之前，我要問你個問題，如果你答「我信。」咁我就差唔多百分百有把握你會買呢隻股票。
資深股票客戶謝太：Karen？邊隻股票咁犀利？問乜嘢先？
Karen：謝太，你信唔信中國軍力、外交手腕會愈來愈強，令到中國政府愈來愈能影響外國政府政策？
謝太：我信。
「棄嬰」都有前景
Karen：好！今日我介紹你買嘅，就係可以去「賭」中國影響外國嘅能力，能力愈強，呢隻股票就會升得愈勁。就係135中油香港，呢間公司其實都算係中國石油母公司嘅棄嬰。93年中國由石油出口國變成入口國，咁同年，中油香港借殼上市，我諗係為中國石油部製造可以向外收購資產，或者公司化嘅出路。不過，頭幾年，中油香港乜都冇做，直到96年，佢得到第一份中國石油部嘅生產合約，又撞正紅籌當炒「國家注入資產，明益香港人」概念，市場有人開始吹風話，中央會成個中國石油部注入中油香港。
謝太：我記得！一年之內由$0.15炒到$5一股，升咗30幾倍，有人話呢隻股票應該轉名，唔好叫「中國石油」應該叫「中國神油」。
Karen：呢個就唔記得到，我仲讀緊書。不過，最後中國石油部都搞咗857中石油出來，好多人就覺得135中油香港玩完。點知，中油香港搵到自己嘅生存理由，就係去啲美國人權組織會反對投資嘅地方，去收購油井、石油業務。因為857中石油有喺紐約上市，如果中國石油母公司，要將某啲資產上市，好多時唔可以注入857。中油香港可以flyundertheradar，偷偷地去收購。
謝太：間公司貴唔貴？
Karen：唔貴！每一蚊利潤，都唔需要10蚊去買，市盈率低過十倍。
謝太：好，幫我買！