惹火嘅教統局局長「阿瑟王」李國章，噚日又施展有罵必還口嘅精神，今次遭殃嘅係由一班女教師組成嘅香港女教師協會。該會前日公布一項教師對敬師日嘅調查，有一半人覺得教統局搞敬師日係尊師嘅門面工夫，26%更話政府帶頭唔尊重老師，該會要求教統局檢討吓敬師活動，唔好只係識表揚部份教師。
李國章噚日喺敬師日慶典後被問及對該調查嘅睇法時，即刻變臉，用佢例牌嘅反問式方法斥責女教師協會，「呢啲（獲得表揚教師）係由學校、教師提名出嚟，你話有冇代表性？大家有眼可以睇到……最緊要你要問吓今日敬師日咁開心，你要做個咁嘅調查出來，（係咪要）踩吓我啲教師？係唔係自己攞唔到，唔抵得人哋得到表揚呢？」佢又話噚日佢同常秘羅范椒芬等一眾高層都有出席，唔通咁仲唔算尊重老師咩？
女教師協會主席周蘿茜有啲激氣，讚李國章「做咗功課，知我未得過獎」。佢又話個調查好客觀，問卷冇偏見，唔明點解李國章咁講；而教統局每年只係表揚每校兩個老師，會令人覺得只有佢哋先係好老師，所以希望教統局檢討啫。