身兼扶貧委員會主席嘅唐唐，一早答應過啲政黨，話會研究設立「兒童基金」，當然唔係狙擊領匯嗰隻啦！咁轄下嘅兒童及青少年專責小組又點敢偷懶？據知佢哋初步研究過後，發現外國推行嘅兒童基金，並唔係好似某啲政黨咁派錢就得，參考英、美兩地，發現兒童基金應該係一種儲蓄計劃，即係家長為仔女儲咗啲錢，政府又按比例儲一啲，而且仲要立法規定，呢筆錢要等仔女大個咗先可以用，慎防一啲家長濫用。
扶委會都發現，呢個方法明顯比現兜兜派錢好，尤其佢哋都覺得，派出嘅社會資助都唔少，無理由再派啩？反而幫細路儲吓錢咪仲好。為咗令各界（尤其政黨）更了解咩係兒童基金，扶委會11月10日會搞大型論壇，邀請埋英美專家出席，預計明年3月可以出報告交功課，咁大家就唔會怪唐唐又只講不做啦。