徐濠縈同老公陳奕迅（Eason）嘅愛情結晶品陳康堤，仲有兩個月就兩歲大。雖然囡囡好可愛，不過陳師奶去蒲仲多過湊女。
好似前晚咁，徐濠縈悉心打扮去中環出席PatriziaPepe嘅秋冬時裝騷，仲話開始幫老公換季，佢又話個女好嗲老公。至於再追多個，佢就話：「呢啲係天意，我見個女返學咁多同學仔，都係好得意，我諗五年抱兩都得嘅！」
菲傭湊走
五年抱兩就易，但要抽到時間湊女就難，以B女𠵱家嘅年齡，係需要瞓晏覺，唔知係陳師奶係因為夜晚多party，抑或私務繁忙，所以多數喺下晝至帶女出街。早排佢至抱B女蒲謝霆鋒中環band房，日前佢又喺下晝4點幾出擊，帶埋囡囡同菲傭去中環ifc商場嘅isola餐廳歎茶。
平日瞓到日上三竿先起身嘅徐濠縈當日叉足電出街，但B女捱到傍晚6點已經頂唔順，坐埋一邊放蚊，眼皮垂晒落嚟。徐濠縈見個女攰成咁，至嗌菲傭先湊個女返屋企，鬼咁眼瞓嘅康堤仲發脾氣扭抱㖭，結果個菲傭就一手拎住大袋重物，一手抱起B女出商場打的。
無女一身free嘅徐濠縈繼續留喺餐廳，原來佢係約咗馮德倫撐枱腳，短敍一粒鐘後至各自走。